獨家村

我唔鍾意鄰居。

唔鍾意一出門見到鄰居。

唔鍾意同人一齊搭𨋢。

我唔鍾意那個漫長的靜止空間,

最唔鍾意望到你望我,

極討厭你啲細路睥住我,

由入𨋢一路睥到出𨋢。

入到大堂如果有人等緊𨋢,我會去攞信。

如果入大廈時前面有人,我會放慢腳步。

如果被逼一起入𨋢,然後原來大家按同一層,

我的臉會變得很黑,心裡「jip」得很大聲。

你個死八婆點解咁唔鍾意人地?

人地有什麼得罪你?

沒有,我不是不喜歡他們as一個「人」,我又唔識佢地,點會唔鍾意。我只是不喜歡「鄰居」,不喜歡知道大家住同一棟大廈,因為我不喜歡陌生人知道我住哪裡,而這些鄰居都是我被逼要讓他們知道住址的。如果我出𨋢時還有人繼續上去,在𨋢門關上前我會故意亂走一個方向,至少𨋢內的人不會知道我去那個單位。

記得有次做直播,有人很得意的說是同大廈的鄰居,我真的火到不得了。這是我最最最最不想知道的消息。我跟這大廈的任何人都沒有關係,就跟街上的陌生人一樣,不會因為在同一棟大廈而變得不一樣。在我有能力住獨立屋或至少搬到一梯只有一兩伙的地方前,我都是這樣黑人憎的了。

我需要大量的私人空間和私隱度,我不可以住屋苑,就算clubhouse有幾正,lobby有幾豪華,但因為會有更多鄰居(因為有好多棟),全部人都是這裡的子民,被逼跟陌生人有一種關係,感覺不好。出到街其實大家都是香港的子民,但地方大啲,人種多啲,分散啲,所以還可以。有些國家每家獨立一間屋,鄰居唔 mind遇見大家,甚至做friend。在香港像在打一場爭取空間的仗,離開幾百公尺的家,一關門就開始作戰。

我已經非常幸福,有自己的地方,有很多人跟家人同住,自主的空間只有睡房,更有很多人的家人是會擅自進入,其實,連呢幾十尺都無。

有些人願意俾錢買空間,到共享工作室工作,但其實只是買了一堆志同道合,不會互相騷擾的人類來共享一個空間,私人嘛,還是沒有。

有些人戀愛了,開始同居,也是自願地交出僅有的私人空間(不是指心靈上,是現實的空間),男生發現他不能創作,女生發現她再不可以在屋裡任何地方塗指甲。

鄰居之間冷漠,朝早不叫早晨。見面不打招呼,香港人好唔friendly。在外國,地方大,大家自己有足夠的私人空間,當然可以對陌生人nice啲,但在香港,我離開自己的空間,都未出到街就要見到你這個陌生人,我未瞓醒,未ready迎接世界呀喂,唔想望你唔想講嘢住。我prefer鄰居當見我唔到,當我透明,不用跟我打招呼,我不會覺得你無禮貌。

空間就是空氣,有空間就可以呼吸,減壓,舒服,心情好。祝大家無論在哪裡都生活得舒舒服服,自由自在。

包底說一句:要有禮貌,如果咁唔好彩有交流,微笑一下囉。但係每次我呢個笑容都會好醜樣。

在留言位置告訴我你的私人空間在哪裡?

有沒有人闖進來?

他們做了什麼去踐踏你的私人空間?

😉我明晚在直播會讀出~

Published by

EKEE

🧛🏻‍♀️Author. Tarot/ Akashic Record reader. Singer-songwriter 🔮tarot contact: 9768-5388 (whatsapp only) 💄Other business: richekee@gmail.com

20 thoughts on “獨家村

  1. 在香港,我正正就是自主的空間只有睡房,所以而家在日本working holiday,寧願俾多少少租都自己系東京租屋住,唔住Share House。而家自己一個系屋企做咩都冇人理,想幾點瞓都得,又冇人攪亂我d野,覺得好舒服自在!係住樓下既中國人成日都大聲講野同叫d朋友黎開party好鬼嘈!(已經寫左email去物業公司投訴左兩次,好似有d改善😬)

    P.S: 我都好討厭同鄰居交流

    Like

  2. 我也不喜歡鄰居,但偏偏就有一些討厭的鄰居住我附近,每次經過我屋企門口就會望下入黎,望下入面有無人,每次染完頭髮或者著得佢地眼中所謂嘅誇張,就會細細聲(但又要比我聽到)咁對我評頭品足。返工行出屋企,要同成村人打招呼,hi auntie,hi uncle!好煩好煩!拜託!拜託!大家可以當我透明嗎?
    (利申:我已經係住獨立村屋)

    Like

  3. 我都好怕, 明明就係唔熟, 但係見到面佢又會扮熟同你打招呼, 為咗表現我有教養我又唔會應佢。最慘係佢同你坐同一架車, 佢一上車會坐你隔離, 然後開始講A座3/F陳師奶打仔, C座地下諗住賣樓, 隔離F座黃生黃太尋晚鬧交, 仲有佢自己隻狗有幾乖(但我日日聽到佢叫)。而我, 只可以微笑, 微笑, 微笑, 直到落車。我唔係主張鄰居無交流, 只係我唔鍾意人八卦, 仲要八卦人地咁多嘢。(利申: 已經係住一梯一伙村屋)

    Like

  4. 好有同感!我都唔鍾意見到鄰居。
    婚前同屋企人住公屋,每日出門前都會用電眼望下出面有冇人,如果聽到隔離屋開門聲我都會唔出門住,同埋通常都係行樓梯出入。
    婚後同老公屋企人住一梯一伙村屋,可減低見到鄰居嘅機會,但奶奶經常擅自進入我同老公間房!極討厭!小小私隱同私人空間都冇!
    所以同老公決定今年會搬出嚟住!

    Like

  5. 有時都唔想唔鍾意d鄰居,但係好多時d人成日都R水吹真心討厭,明明住同1層同1部“車立”都可以問返屋企啊?唔返屋企唔通去你屋企咩!我唔介意打完招呼就dead air架

    Like

  6. 同意,我同屋企人住果時,放工番到屋企或者放假訓醒都要喺房攤一陣先ready出去同人講‘’早晨‘’or‘’我番黎喇‘’!但自從嫁左人空間少左,大家未習慣大家生活模式,有好幾次喺房進行‘’攤屍模式‘’時都被人胡亂闖入。感覺超大爽!就好似係一個氣泡比人篤爆左一樣!個心拿住拿住!個拳頭揸到實一實!完!

    Like

  7. 我名意上有間房,裏面放曬我嘅野同D衫,但係呢間房唔係我瞓,其實我沒有真正的私人空間,反而只有私人時間,我偏偏喜歡在深夜爸媽瞓曬嘅時候做自己喜歡的事,例如砌Lego丶畫畫丶拆自己出街買咗嘅野丶睇DVD……
    其實我有諗過租屋住,因為可以放自己鍾意嘅嘢又唔會俾人話佢買啲唔等使嘅野
    (利申:3丁友住公屋)

    Like

  8. 我棟大廈有個八婆同看更好熟,成日都聽到佢地講是非。有次男朋友送我返屋企,咁啱同八婆同𨋢,因以佢係住高層嘅,所以我出先過佢。咁我同男朋友出左𨋢之後我見𨋢門一直都唔關,我覺得奇怪所以唔入屋住,企喺走廊等佢關門先。點知個八婆居然伸咗個頭出黎想望我住邊!!!見到四隻眼望住佢之後,佢即刻縮返個頭入去關𨋢門走左了。

    Like

  9. (以下篇野將會好長,請做心理準備😂)

    我都唔中意同人扮熟,或刻意同人social,同如果不小心有眼神交流,或者會打一聲招呼後就唔講野。

    而家我住呢度,係自己租嘅劏房,但有時候唔慣自己一個人或者驚驚地 會叫男友上黎,呢個時候就要同佢share一個不足80尺嘅空間,初時佢在無通知過我嘅情況下過黎,我都有發佢脾氣,所以就算係我喜歡嘅人,都要同我有聲交代後才進入我的空間。

    以前我是同男友同居的,即係佢爸爸媽咪呀妹細佬都係到,有時大哥大嫂姪仔或其他親戚會上黎。但我個陣時係抑鬱到個心好唔舒服,會喊會無表情會好無心情,因為完全無話事權之餘,私穩同空間可以話係零。如果有時唔應酬佢地,又會有人比說話比面色我睇。

    再以前,我係同自己屋企人同住,一樣係無乜話事權,加上有一個衝動唔成熟唔顧家嘅老豆,成日要忍受佢嘅臭脾氣,又完全唔會理屋企d野,搞到一家人關係都幾差。我又唔可以鎖起自己房門(除左換衫之外),屋企人都係自出自入,唔會理你起入面做緊d咩。而且屋企人講野又大大聲,成日搞到你唔可以好地地靜靜地做野。

    Like

  10. //我屋企個門口就係對住lift口嘅!
    唔好話𨋢入面有無人啦
    一出𨋢我就會向右行
    𨋢門未閂我都唔會企返自己門口
    因為個𨋢入面個cam正正射住我門口
    全世界等𨋢都知我住邊

    //有看更嘅大廈都好煩
    有日有個看更叫我做陳小姐
    我嬲嬲地話我地遠近親都無人姓陳
    之後我講返我個姓後
    佢日問候我夜問候我
    「出街呀?」
    「返黎喇?」
    「買左野呀?」
    有次我幫呀媽買麻雀紙
    看更:「咦,打麻雀呀?」
    我:「唔係,用黎寫字架!」
    有時只係想靜靜地等𨋢

    //我都係獨家村
    獨處也是一門美麗的自習課
    我享受!

    Like

  11. 我同你地呢方面既感覺唔同,我無呢個問題,見到鄰居就咁打聲招呼或者點頭笑下,咁岩同lift,佢地有可能咪問下我係咪放工,答完跟住咪唔出聲,無乜野。夏天有時只關大閘,d小朋友就會過黎睇下有無機會見到貓貓。係樓下等lift基本好短時間,等其間都無留心其他人講乜,有時真係無意聽到既都係講咁佢地自己既野。我老公試過出去掉垃圾,關埋道門,返唔到屋企,又無拎電話,都係靠隔離屋借佢,因為果陣冬天,隔離屋個姨姨叫佢留係佢屋企等我飛的返黎。

    Like

  12. 我都試過當有陌生人在我身後經過,就故意走錯門哈哈哈。我只會在早上和鄰居打招呼講聲“早晨”,如果下午或夜晚見到,我不知道說什麼好,於是什麼都不說,我不想說“食左飯未啊?食左飯啦?放工啦?放學啦?出街啊?”之類的廢話,講左仲尷尬

    Like

  13. 我都好唔鐘意見到鄰居,聽到隔離開門我都會返返入廳等多幾分鐘先再出去。前幾日,我遇到隔隔離單位的鄰居,她真的很煩,每次一見面就要查我家宅。問我,你老公無飛過來找你啊?你老公在那邊賺幾錢一個月啊?你仔仔怎樣怎樣?不停地問,我一直心唸,可不可以不要再問,這些是我的事關你鬼事。再者lift裡面是有其他人。

    Like

  14. 我都好憎要同陌生人溝通
    三唔識七 九唔搭八咁
    自從我由外國返黎香港for good之後
    我唯一的私人自主空間只剩下自己的陰道
    *rolled eyes*

    Like

  15. 我都係唔想有其他人知道我住邊,都係會走相反方向或亂走。尤其是最唔鐘意呀伯個D,如果同一架𨋢。我個心就係度諗好D出𨋢啦或者係度諗如果佢對我做d非禮ge行為咁我會用我袋裡面最重或者最有攻擊性ge野對付佢。我知道我諗得太天真,人地要搞你。佢一定好有把握就落手!(但事實上我只會黑面或者反白眼)。不過我會對保安好有禮貌,打招呼。因為我由小學搬入去到e+佢都係度做,所以我對佢特別有親切感❤️
    題外話,我覺得車廂上面個d人一樣咁黑人憎。我只個d男人擘大個髀比坐、有d呀嬸(扮阿婆)睇你好似好好蝦就大叫或鬧你比位佢坐,但事實上已經面前有個人坐緊關愛座ge健全ge人都唔叫佢讓,竟然叫一個唔係坐關愛座ge辛苦左長期企ge人讓座。仲要死口唔放左大約15分鐘以上,我心諗個d人有無文化同教育過??重有個D呀!例如係打乞嗤都唔黯住個嘴,重要唔覺得自己有問題。我唔係怪你病,而係⋯大佬呀!你d口水噴到我到呀!真係好攞命😫

    Like

  16. 試過租左間屋,個房東講左話唔想人知道佢層樓放幾錢,所以話如果有人問就唔好理佢地,本身以為佢都係講下,點知真係成日撘𨋢遇到有人問「你係咪XXX樓新搬嚟嫁?租嫁?租幾錢呀?」
    最誇張係有個呀伯,到左佢嗰層,擋住部𨋢唔放手,不停問「幾多呀?貴唔貴呀?一萬呀?兩萬?咁即係兩萬啦!啱既兩萬都差唔多」嗰刻真係反晒眼🙄,好想講粗口問佢關你蛋治

    Like

  17. 任性哭鬧尖叫嘅鄰居小朋友、嗌交或者狂野放聲叫床嘅鄰居大朋友…… 深深感覺privacy同寧靜嘅空間都係要用錢買。E記所講志同道合、可以共享空間而唔會互相騷擾嘅拍檔,其實已經好難得。響我有能力搬走之前,我買咗隔音耳塞。

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s