魔女伊維特 每月星座運程🧡🖤🧡 2020 NOVEMBER

每月星座運程

2020 Nov

十一月。

可以放慢腳步,準備新嘅一年。

睇吓今期星座啦~Let’s Go!

白羊座

整體:

胸有成竹。

戀愛:

呢個月你充滿自信,

以為好好表現咗自己,

但係其實你以為人哋想要嗰啲嘢,

並非人哋想要嗰啲嘢。

譬如你以為你另一半希望你善解人意,

其實可能佢想你講嘢直接啲。

雖然今個月有自信,

但係同對方缺乏溝通,

所以會捉錯用神。

如果單身嘅話就唔好猜想人哋想要啲乜,

做返最原裝正版嘅自己

就會吸引到適合嘅人過嚟。

事業:

如果打算有新計劃可以開始動手,

如果打算創業,建議自己一個做,

如果已經有partner,

你要留意自己要有話事權,

一定要感覺到自己嘅力量同存在感。

呢個月只要你有足夠嘅信心,

對自己工作表現肯定,

身邊嘅人就會睇到。

仲有就係今個月你俾人嘅意見都十分有用,

如果有時間嘅話可以幫助吓身邊嘅朋友,

不過只限於俾意見,

並非借錢或者落手幫佢做埋。

金牛座

整體:

繼續努力,就快見到成果。

愛情:

今個月嘅愛情係種瓜得瓜, 種豆得豆。

你擺幾多時間落去展現自己,

同人溝通互動,

出外社交等等,

就會得到相等或者更高價值嘅嘢返嚟。

所以,建議今個月外在同內在都好好維持係最佳狀態,因為如果你Hea嘅話,

得到嘅回報都係Hea。

事業:

今個月你仍然要下一啲苦功,

OT就OT啦,

你嘅努力未必會得到讚賞,

但係宇宙已經接收到,

所以你都係會得到應有嘅回報。

如果投資嘅話,

建議唔好玩啲又快又貪心嘅嘢,

開始一項長線投資亦都係好嘅決定,

穩穩陣陣嗰啲。

雙子座

整體:

點解我咁黑仔?

愛情:

今個月最多胡思亂想,

本來冇乜嘢都俾你幻想到好差,

對方一個小動作,

你就幻想咗好多負面嘅嘢出嚟。

今個月特別敏感,

經常將自己嘅感覺建基於人哋對你嘅態度,

原本可以開心自在嘅你,

不斷俾身邊嘅環境影響。

建議唔好咁在意身邊嘅一切,

因為其實大家眼中嘅你都好美好,

但係今個月你自己會睇自己唔順眼。

事業:

擔心自己地位不保,

或者唔肯定自己係公司嘅地位,

其實我見你又幾穩陣,

根本就唔使擔心咁多。

今個月適合做一啲靜態啲嘅工作,

對人嘅時候小心講多錯多,

因為今個月缺乏自信,

如果想得到客戶嘅信心,

見面或者講電話時,

請留意自己嘅表現,

唔好俾對方感覺到你缺乏自信。

巨蟹座

整體:

家庭生活

愛情:

今個月好追求齊齊整整嘅感覺,

喜愛群體活動,

嚮往家庭溫暖。

如果有另一半,不妨多啲留喺屋企活動,

或者見吓大家嘅家人,

感受吓家庭溫暖。

如果係單身嘅話,

適宜多啲去群體活動,

就算冇新朋友喺裏面,

呢種快樂嘅感覺都會令你變得吸引人。

事業:

今個月你有好多嘢想做,

所以時間管理係最緊要嘅,

千祈唔好俾自己有趕急嘅感覺,

就算有好多嘢要做都係輕鬆咁樣去做。

如果想學嘢,或者發展新項目嘅話,

似乎今個月已經滿額,

好好享受同經歷你手頭上做緊嘅嘢先啦,

成世人流流長,總有機會玩其他嘢嘅。

如果時間管理唔好,

你嘅錢亦會變得鬆散。

獅子座

整體:

Spiritual

愛情:

呢個月心靈溝通最重要,

你會特別喜歡嗰啲同你傾到計嘅人,

唔係淨係吃喝玩樂,

亦都唔係淨係外貌協會,

呢個月你發現內涵好重要,

亦都係你係一個人身上最嚮往嘅部份。

簡單來講,如果你覺得對方好蠢嘅話,

就算佢幾靚都冇用。

嘗試搵一個能夠同你一齊成長嘅人吧。

其實傾一兩次計就會知道,

所以溝通唔到嘅人就唔好再嘥時間。

事業:

呢個月應該着重喺理財,

講真未必會搵到大錢,

但係係時候review一吓自己理財嘅習慣,

希望可以儲到咁多錢~

如果要攞一筆錢出嚟投資嘅話,

今個月未必係時候,

睇定啲先。

處女座

整體:

今個月得到大家嘅愛

愛情:

今個月會接收大量人哋俾你嘅愛,

不過我見到嘅係家庭或者朋友比較多,

如果家庭裏面有老公老婆

就當然係關愛情事啦,

但係如果單身嘅話,

似乎未咁快會有人出嚟比浪漫嘅愛你。

唔緊要,只要你願意及習慣接收,

愛你嘅人就會搵機會出現。

所以你未必要做好多出去識人嘅活動,

但係反而你要同親人或者朋友多啲互動,

學習交換愛同關注。

事業:

唔好一個人做晒啲嘢,

亦都唔好將自己嘅秘密講晒比人聽,

同同事嘅相處要小心,

返工嘅時候盡量將私人嘢放埋一邊,

熱愛你嘅工作,

同同事好好互動,

平穩咁樣過到呢個月。

如果有嘢想爭取嘅話,

過埋今個月先出聲會好啲。

天枰座

整體:

最緊要聰明

愛情:

呢個月嘅人際關係或者愛情,

重質不中量。

大部份嘅時間可以留返比自己,

不過記住要俾身邊嘅人知道

你對佢哋嘅關注同重視。

呢個原理亦都比較顯眼,

所以你嘅一句|都會有人睇到,

如果身邊有心儀對象嘅話

就要好好留意自己嘅言行,

甚至係你post啲乜上social media喇~

事業:

今個月可以做少少賺多多,

就算唔係賺得真金白銀,

亦都可以賺取時間或者認同。

呢個月你辦事能力好高,

亦都料事如神,有洞察力,

所以事業上面得心應手,

能夠做出一啲幾好嘅決定。

天蠍座

整體:

繼續成功嘅樣子喎。

愛情:

呢個月你開心自在,

你嘅正能量令大家都俾你吸引住,

但係你會忽略咗其他人嘅存在,

雖然自己過得好開心,

但係卻忘記咗同人互動,

有時對方會懷疑你係唔係對自己冇興趣。

如果有目標人物嘅話,

就記住要問吓一啲關於「你」嘅問題,

而唔係講每一樣野都關於你自己。

事業:

呢個月全部人都望住你,

大家都羨慕你,

就算你自己唔覺得自己咁成功,

但係大家都睇到你嘅好處。

呢個月會散發一種令人想同你合作嘅氣場,

好想同你成為朋友,

好想同你成為同事,

所以你要嚴格咁樣選擇身邊嘅人,

千祈唔好來者不拒,

個個搵你傾啲嘢你又傾。

記住事業最終benefit嘅人要係你自己。

射手座

整體:

要有節制。

愛情:

今個月你實在冇乜心情去講愛情,

你有好多日常事務要處理,

自己嘅事同埋交際嘅事你會瞓得好清,

你希望九成時間都處理自己嘅事,

其實咁樣絕對冇問題,

只要心裏面感覺平衡就可以了。

講真呢個月你身邊嘅人都會識做,

未必會打擾你,

但係如果你想有戀愛嘅話,

咁你就要作出適當嘅時間起身啦,

你唔可以只係用10%嘅時間去交際,

但係又無啦啦識到大量新朋友㗎。

事業:

今個月記住收入一定要大過支出,

俾自己嘅時間一定要大過俾公司嘅時間,

總之今個月要自私啲,

月尾總結嘅時候要成為大贏家。

你有時對數字唔係太敏感,

可能做完一輪苦工之後,

收入同付出都唔成正比,

所以記住一定要計好呢兩條數。

如果你想開一個新嘅生意,

請先計好呢個生意會唔會攞走

你所有時間同資金。

山羊座

整體:

終於都會輪到你嘅

愛情:

講真,單身嘅你,

愛情應該仲未嚟。

適合嘅人仲未出現,

正面啲講,佢行緊過嚟㗎喇,

不過你都要俾啲時間人哋行過嚟㗎。

你嘅對象會係好正常嘅地方出現,

可能係朋友嘅朋友,

又或者係工作環境等等。

如果已經有另一半嘅你,

千祈唔好將你哋嘅活動變成例行公事,

一旦進入咗呢個模式,

就好難攞返戀愛嘅感覺。

事業:

機會係留俾有準備嘅人,

所以你乖乖地準備吓先,

因為有好多人同你係差唔多嘅位置,

又或者係好多人都同你爭取緊差不多嘅嘢,

只有默默努力嘅人

先至會儲夠分數去得到成果。

唔需要太outstanding,

腳踏實地交足貨就會得到成果。

水瓶座

整體:

唔好搞對抗

愛情:

今個月要將正面發大,

負面野盡量避一避,

例如大家討論嘅時候如果有爭拗一個點開始,

就好容易會引發世界大戰。

相反地如果將大家嘅浪漫感覺伸延,

二人際關係就會進入下一個階段。

有諗過結婚嘅情侶,

不如今個月再攞呢個話題出嚟傾吓啦。

事業:

知彼知己百戰百勝,

認識對方最好嘅做法並唔係在旁觀察,

而係真正去認識佢地,

從佢哋身上學習。

所以今個月不妨同前輩聯絡吓,

同你覺得做得好嘅人聯絡吓。

今個月如果對身邊嘅人有任何不滿,

記住你自己亦有可能擁有呢啲特質,

上天就係俾一面鏡你睇,

幫助你喺事業裏面成為一個更好嘅人。

雙魚座

整體:

感覺混亂

愛情:

你覺得自己係一個唔理想嘅狀況,

因為呢個係一個冇選擇權嘅狀況,

你想離開呢個狀況,

但係又有少少好似認咗命咁。

其實所有人都有選擇權,

如果狀況同環境唔可以改變,

你就嘗試改變你自己,

或者直接行開,離開呢度。

事業:

你似乎睇唔到自己有好多可能性,

今個月有啲隨波逐流,

見到大家都係咁,

覺得自己都係差不多。

其實你識得做嘅嘢並唔係單一,

其實你可以搵錢嘅方法有好多,

如果你想搵多啲嘅話,

就要靠你自己去開創,

不過適宜慢慢嚟,

適宜投放喺一項可以做得完嘅項目,

並唔係用嚟賺快錢嘅項目。

記住,你唔想做嘅嘢應該冇人逼到你做。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s