十月。似乎大家今個月都平衡少少，
生活冇咁crazy了。
睇吓今期星座啦～Let’s Go!
白羊座
整體：
今個月其他人好難明白你喎。
戀愛：
今個月實在諗太多野，
思想唔算混亂，
不過只怪在你越諗越深，
越諗越遠，
有時已經諗到離開咗原本嘅主題。
身邊嘅人都嘗試進入你嘅世界，
不過跟唔上進度。
你就好似一間凌亂嘅房間，
只有你自己知道啲嘢擺喺邊。
想同身邊嘅人好好建立關係，
可以將談話內容變得簡單，
最近唔係好適宜討論甚至辯論，
好難會得到好氣氛。
事業：
你知道係時候要作出一啲改變，
心裏面有個想改變嘅感覺，
但係你講唔出你自己想點，
所以會有一點迷惘嘅感覺。
其實而家你嘅狀況冇任何急切性去作出改變，
你適合逗留喺一份穩陣嘅工作，
能夠俾時間同自由度你去思考，
似乎出年會比較適合你作出重大嘅改變。
到達right timing嘅時候你就自然會知自己想做乜。
金牛座
整體：
需要私人空間。
愛情：
呢個月會對獨處時間有啲渴求，
如果係戀愛中嘅人，
記得一定要有返一啲私人時間。
唔係要喺私人時間裏面完成100樣工作
而係需要一啲能夠放鬆，
同自己好好相處嘅時間。
係唔係單身都好，
似乎今個月自己比其他人重要，
而這是正常的，不是自私。
事業：
因為今個月懶得同人溝通，
可能會錯失一啲機會，
因為從活動當中會產生一啲新嘅機會同火花，
建議單獨行動嘅時候將所有計劃先思考好，
然後跟同事或者客人互動嘅時候
就可以有一個充實嘅對話，
從中得到最多嘅好處。
雙子座
整體：
呢個月要求十分之高。
愛情：
你對另一半嘅要求特別高，
如果係單身嘅話，
你會好難睇得起一個人，
包括你朋友嘅男朋友或者女朋友
你都會睇到好多缺點。
唔係你唔想戀愛，
而係你完全搵唔到一個對手去投入，
如果你正在戀愛中，
今個月好容易睇唔順眼對方做嘅所有嘢，
建議你都係冷靜處理，
因為發生同一件事，
喺下個月可能你已經唔嬲或者唔會嫌棄。
事業：
呢個月事業運不錯，因為你目標明確，
堅定地向着目標前進，
所以事情應該會喺你預計之內發生。
除非你被身邊嘅人影響倒，
如果唔係應該幾順利。
巨蟹座
整體：
點解咁負面啊諗嘢？
愛情：
呢個月仍然好感性，
仍然好敏感，
對方一個emoji你就幻想咗好多嘢出嚟，
而且多數都係負面嘅嘢。
如果本身有少少自卑
你就會諗到所有嘢都好差。
你要記住你今個月帶咗一副眼鏡，
遮住咗自己，望唔到自己嘅優點。
有冇另一半都好，
需要有返啲自信先至有運行。
而且你今個月嘅行動性好低，
如果想有任何進展似乎唔係一個良好嘅狀態。
事業：
今個月有啲懶，
工作嘅事唔係好想理會，
其實冇乜問題，
不過最緊要唔好俾人睇知道
我指同事老闆同埋客人等等。
懶都要懶得聰明，
如果唔係就算冇做錯嘢
都會影響你嘅聲譽㗎喇。
獅子座
整體：
好想大家聽你話，但係佢地未必聽
愛情：
戀愛中容易出現爭執，
多數都係因為大家都想自己拗贏，
而你多數係強勢嘅一個，
對方有時冇繼續討論，
唔代表佢個心已經冇嘢。
呢幾個星期唔建議太多伸延性嘅討論，
多啲一齊have fun會比較好。
單身嘅人就快啲搵人同你have fun啦。
事業：
今個月辦事能力高，
公司知道唔可以冇咗你，
如果你有下屬嘅話記住要對人哋好啲，
唔好成日覺得人哋蠢，
需要比時間人哋成長，
遲啲先至可以有你咁醒㗎嘛～
處女座
整體：
繼續心情靚，今個月有動力～
愛情：
呢個月你實在太吸引，
真係吸引異性同性嗰隻吸引，
令人嚮往同埋心心眼嗰隻吸引。
所以唔好自我關閉，
就算喺網上都可以活躍一啲。
如果有另一半嘅話，
佢呢個月見到你嘅可愛之處，
所以應該爭取時間多啲互動同見面。
事業：
今個月好靈活好醒目，
好多idea，適宜為自己做長遠嘅打算，
又或者係做一啲創作嘅工作。
不過因為你呢個月好熱心，
所以千祈唔好將所有時間用咗嚟幫其他人諗嘢。
天枰座
整體：
今個月認真看人生
愛情：
呢個月尾開始諗將來，
未來嘅日子究竟會點，
想唔想自己一個？
或者想唔想同身邊嘅人進一步。
呢個月當你想認真嘅時候，
如果你嘅另一半唔認真，
你就會感覺大家好唔同步，
覺得好失望。
希望你能夠搵到一個同你同步嘅人。
事業：
可能會有一個新開始，
可能會有突如其來嘅事發生，
但係你要記住，
全部嘢都只會發生喺一個最適合嘅時間，
你只要繼續勇敢向前行就可以了。
老土啲都要講，明天會更好。
唔係鼓勵嘅說話，係塔羅嘅預測。
天蠍座
整體：
充滿力量，成功。
愛情：
呢個月你有一種吸引力，
令人想倚靠你，你也因此感到存在感，
小心坐正咗喺呢個角色，
尤其是如果未同對方一齊嘅話，
小心做咗兵，
不停為對方解決問題，
做咗好多同浪漫無關嘅事。
事業：
有冇諗過創業，
又或者做領導嘅角色？
今個月你就有呢個力量，
如果想做就積極做，
有任何想向前嘅動作都可以做喇。
如果要同其他人合作，
或者你仲係小薯仔嘅話，
講嘢要小心，唔好太鋒芒畢露。
射手座
整體：
需要整理舊事才可以向前行。
愛情：
今個月唔係好ready去接受人哋對你嘅好，
就算身邊有好愛你嘅人，
你都未必可以接受佢哋嘅愛。
唔係因為你完全冇感覺，
只係你有啲舊記憶飄左出嚟未清理好。
處理舊記憶有好多方法，
不過唔係要忘記，而係要接受佢嘅存在，
不過唔好俾佢影響今日嘅你嘅情緒。
事業：
今個月其實狀態唔錯，
不過須在不停懷疑自己，
搞到有時拖慢左行動或者決定，
不如試吓大膽少少相信自己，
因為你身邊嘅人都欣賞你，
其實大家都睇到你嘅強項㗎。
山羊座
整體：
心事重重，心散心散
愛情：
呢個月唔知自己想點，
行動性又低，
又唔係好恨戀愛
不如今個月少啲應酬，
費事越見多人心裡越混亂。
事業：
呢個月嘅你實在係懶洋洋，
好適合去旅行嘅月份，
可惜可惜。
留返啲精力享受人生啦，
如果做急趕嘅工作你小心會出錯，
對住強勢嘅人就自己楊一樣路，
因為你而家嘅氣場唔會夠佢鬥。
水瓶座
整體：
青春能量，充滿活力
愛情：
你想點做就點做，
絕對不可以守株待兔，
因為今個月必須由你採取行動。
今個月你心想事成嘅能量幾大，
所以你一定要把握時機，
做多啲俾人睇得見你嘅嘢先至會吸引到新戀情嘅誕生。
事業：
今個月終於有人發現你嘅好處啦，
之前未必見到你，可能你係實幹型，
可能你係初來步到，
總之今個月你就會自動地發揮光芒。
不妨多啲同上級又或者前輩溝通，
佢哋會覺得你十分之勤奮同埋上進。
如果同人合作嘅話，小心你會做埋人哋嗰份。
遇着懶人嘅話，你就要坐上去分派工作嘅位置，話俾佢聽佢要做啲乜。
雙魚座
整體：
細心慢慢做，成果在將來
愛情：
今個月你嘅溫暖同埋溫柔
身邊嘅人都能夠感覺到
好似粉晶咁，大家都想親近你。
不過講真你今個月好似想有啲me time多過想同人交際。如果真係有對任何人有興趣，
至少都要俾人知道你想進一步，
不過最近有啲忙之嘛～
唔好因為又想自己一個宅在家而錯失良好機會呀。
事業：
今個月好適宜學習，
或者至少睇一啲有意義，或者有嘢學嘅影片，
因為如果攞咗今個月嘅能量去煲劇嘅話，
好似有啲浪費。
喺工作方面，經驗都好重要
所以盡量放膽去試落手做多啲，
你要爭取嘅係經驗，而唔係表現
當你學習左，穩定咗，先至再去諗表現啦。
EVITAvsEVITA 