傻仔的價值

商業社會好多人同你扮friend,初次見面嘅同你扮friend,多次見面嘅同你扮friend,合作無間嘅同你扮friend。扮friend好多好處。

1. 有禮貌

2. 無位俾你入

3. 壓你價

4. 攞你著數(在你唔知情的情況下)

好多做design,做音樂,做攝影等等的朋友都會遇過「朋友」要求免費服務。唔係一齊做個project,而係單方受益嗰隻

「你咁勁,幫我公司整個logo吖!」

「你咁勁,幫我影啲相吖!」

「你咁勁,幫我整隻jingle吖!」

而因為係「朋友」,所以大家又唔好意思話要收錢,但做完自己又唔開心,好似俾人非禮咗唔敢出聲咁。

出動「熟人語氣」,例如售貨員跟你第一次見面,但已經用熟人語氣跟你說:「著得好靚呀~ 計平啲俾你啦~見係你咋!」其實真係好friend咩?佢想要你啲錢,佢同個個都會咁講,佢每日同幾十個人一見如故。

「今次第一次合作,俾個友情價嚟吖,下次一定幫襯你!」下次?無下次了。

「大家咁熟,俾個友情價嚟吖!」兩個人未試過單獨出街,叫做熟嗎?之間有友情嗎?你係咁樣對friend的嗎?我同你friend,我會主動給你友情價來試愛,但你自己舉著友情價的牌子對著我行過來,我有點傷心。就是男友主動送包包給你,跟你主動要求男友送包包的分別,動機不是出於好意,你只是想要包包!

多年來不斷分享的一個笑話。美容院打來「Phoebe好掛住你呀,幾時來做facial呀?」

黐線,邊鬼個Phoebe?!

「今次budget好tight呀。」

「問吓個客先。」

「我地都唔想㗎。」

「個客要,我地都無辦法~」

其實有邊次budget唔tight?收咗客戶一大舊錢,唔想分咁多出來,梗係tight(有時連一蚊都唔分,因為成功叫到幾隻傻豬免費做嘢,然後每次都叫啲傻豬,如果有多啲budget都唔會俾傻豬,因為傻豬根本唔知有budget呢樣嘢,傻豬以為同對方係朋友,傻豬唔知老細俾舊錢你搞飯局,其實黎食飯已經蝕抵咗俾老細。

不過!有好多人都唔係傻仔,佢地乜都知,知你公司點運作,點賺錢,但佢地只係唔想搞事,唔想你難做,唔想你樣衰才不篤爆你。

中間人A小姐認識廚師B小姐多年,大家都有多年經驗,對市場熟識。有天A問B:「你煮牛排很好吃,我客人想要,買你一塊,十蚊可以嗎?」大家都知牛排公價是一百蚊。十蚊是一個極侮辱的價錢。B好傷心。「難道A覺得我是十蚊那群人?!」

你出一個價錢,清清楚楚讓對方知道他/她在你心目中的價值。如果你「朋友」,親戚,公司,另一半,乜水也好,開一個侮辱價來買你的服務,一定要企硬!我好朋友給大家的金句:「人家開的價錢並不等於你的價值」他們夠膽死拿著一蚊到麥記叫餐,樣衰的不是麥記,是他們自己,他們在侮辱自己。

傻仔在這個商業社會急速成長,很多被視為傻仔的已在你不知不覺間成為比你更醒的人。所以deal嘢時小心deal自己假。

祝各位錢途無限~

獨家村

我唔鍾意鄰居。

唔鍾意一出門見到鄰居。

唔鍾意同人一齊搭𨋢。

我唔鍾意那個漫長的靜止空間,

最唔鍾意望到你望我,

極討厭你啲細路睥住我,

由入𨋢一路睥到出𨋢。

入到大堂如果有人等緊𨋢,我會去攞信。

如果入大廈時前面有人,我會放慢腳步。

如果被逼一起入𨋢,然後原來大家按同一層,

我的臉會變得很黑,心裡「jip」得很大聲。

你個死八婆點解咁唔鍾意人地?

人地有什麼得罪你?

沒有,我不是不喜歡他們as一個「人」,我又唔識佢地,點會唔鍾意。我只是不喜歡「鄰居」,不喜歡知道大家住同一棟大廈,因為我不喜歡陌生人知道我住哪裡,而這些鄰居都是我被逼要讓他們知道住址的。如果我出𨋢時還有人繼續上去,在𨋢門關上前我會故意亂走一個方向,至少𨋢內的人不會知道我去那個單位。

記得有次做直播,有人很得意的說是同大廈的鄰居,我真的火到不得了。這是我最最最最不想知道的消息。我跟這大廈的任何人都沒有關係,就跟街上的陌生人一樣,不會因為在同一棟大廈而變得不一樣。在我有能力住獨立屋或至少搬到一梯只有一兩伙的地方前,我都是這樣黑人憎的了。

我需要大量的私人空間和私隱度,我不可以住屋苑,就算clubhouse有幾正,lobby有幾豪華,但因為會有更多鄰居(因為有好多棟),全部人都是這裡的子民,被逼跟陌生人有一種關係,感覺不好。出到街其實大家都是香港的子民,但地方大啲,人種多啲,分散啲,所以還可以。有些國家每家獨立一間屋,鄰居唔 mind遇見大家,甚至做friend。在香港像在打一場爭取空間的仗,離開幾百公尺的家,一關門就開始作戰。

我已經非常幸福,有自己的地方,有很多人跟家人同住,自主的空間只有睡房,更有很多人的家人是會擅自進入,其實,連呢幾十尺都無。

有些人願意俾錢買空間,到共享工作室工作,但其實只是買了一堆志同道合,不會互相騷擾的人類來共享一個空間,私人嘛,還是沒有。

有些人戀愛了,開始同居,也是自願地交出僅有的私人空間(不是指心靈上,是現實的空間),男生發現他不能創作,女生發現她再不可以在屋裡任何地方塗指甲。

鄰居之間冷漠,朝早不叫早晨。見面不打招呼,香港人好唔friendly。在外國,地方大,大家自己有足夠的私人空間,當然可以對陌生人nice啲,但在香港,我離開自己的空間,都未出到街就要見到你這個陌生人,我未瞓醒,未ready迎接世界呀喂,唔想望你唔想講嘢住。我prefer鄰居當見我唔到,當我透明,不用跟我打招呼,我不會覺得你無禮貌。

空間就是空氣,有空間就可以呼吸,減壓,舒服,心情好。祝大家無論在哪裡都生活得舒舒服服,自由自在。

包底說一句:要有禮貌,如果咁唔好彩有交流,微笑一下囉。但係每次我呢個笑容都會好醜樣。

在留言位置告訴我你的私人空間在哪裡?

有沒有人闖進來?

他們做了什麼去踐踏你的私人空間?

😉我明晚在直播會讀出~

32AA

我是一個會delete留言八婆,這個動作有很多原因,例如當你上載一幅moody照片時,下面有人問你今日食咗飯未,其實咁樣我情願一個留言都沒有,簡直破壞氣氛。我們可以選擇不准許任何人留言,這樣便可以確保你照片營造的氣氛,但是我又不想抹煞其他正常人留言的機會,所以為了99%的人我選擇由我自己親手delete我不喜歡的留言。

某些人的留言我是長期delete的,因為他們留言只是為了留言,如果是支持的留言我也很接受,但是如果每次也留一些令我反感的留言(不是批評的留言),這支持我情願不要了。

例如你化了一個特別的妝,然後那個為留言而留言的人寫:

「咁搞笑嘅~」

「你個嘴做乜嘢」

「阿Kim要食飯喇」(阿Kim是我的貓)

好討厭好討厭好討厭。幻想你畫了一幅畫(認真的畫,不是搞笑漫畫),你上載給大家欣賞,然後有人留言:

「咁搞笑嘅~」

「黃色那個是番薯嗎?」

「你想點姐?」

更討厭的是:

「😂」

我真的討厭這個符號,我自己也會用,我會在遇到一些我覺得好笑到要喊了的時候用。但往往就是你認真地post一張造型照,認真做一些事時就會有人留這個😂,而我也會回覆對方,「究竟有什麼值得笑? !我問你有乜咁好笑呀!」認真便輸了?我不是在玩遊戲,我對自己認真才會進步吧。有時火來了我也不打算控制它。當有人在我認真的時候留這個符號我會感覺被恥笑,因為你在嘲笑我的發表,就像你認真對你男朋友講一些事,但個PK在嬉皮笑臉。(最正是,我問完有什麼好笑,有人又真的大膽又天真地回答我)

IG story 沒有留言位置,即是說:「我在那邊發放的事你不用留言了。」有人為了讓我知道他看了story而在我不關事的照片下面留有關某story的comment ,永遠跟我的照片都九唔搭八!!youtube 我歡迎任何留言,但IG和FB的留言會影響對照片的感觀,所以比較嚴謹。

這些social media的留言區是大庭廣眾的地方,相信很多人留言時都忘記了這一點。你在我圖片下跟我說的話,就等於站在世界中心大叫出來:

「喂!你寫錯字呀😂😂😂」

為什麼你要在大庭廣眾眾目葵葵之下講出來?如果你朋友走光,你會大聲地跟她說嗎?

「喂你走光呀🤣🤣🤣🤣」

你不懂細細聲講嗎?你不懂send message私下講嗎?還是你有心落人家的面?還是覺得好威?要不要頒發一個「認字特警」勳章俾你呀?這樣做好cute嗎?跟你好friend嗎?在不適當的地方大聲說不適當的話,就算你沒有心,也是沒有禮貌。

「車~人地好心提你之嘛~」

我說知道你無心,只可以當不知者不罪,但不代表你下次再犯。

以下這個情況最貼切,某些女生應該會試過,會知道感受吧。正如:

「PHOEBE!麻煩你幫我入倉攞個32AA俾呢位小姐吖!」

新年流流,講返句好嘢先。

我恭喜你呀真係。

成功達成願望需知

我們有兩個新年,所以有兩次定目標,許願,重新出發的機會。

你希望買樓,拍拖,做手作,開網上商店還是做多一點運動?我都有一些目標,應該說是一堆目標,很難全部在一年內實現,所以,是時候將它們分先後。

如何正確地分先後?首先,願望是什麼?譬如,願望是出一本書,買一個名牌包和學功夫(不是認真的啦哈哈)。那你要問自己,為什麼要出一本書,是為了賺錢,為了感動人,還是為了自HIGH。買一個包包,因為你沒有袋用(應該不會吧),為了獎勵自己,為了見客,還是為了得到別人肯定?學功夫,為了強身健體,還是為了打架?當你分析完,應該有點概念那些是你『需要做』,那些是你『想要做』。『需要做』的當然比較重要,多數對你人生有影響,要先實現,『想要做』的只是奢侈品,偶然令自己開心一下也算是健康的事,但當你沒有多餘的時間便不要亂花在奢侈品身上。尤其是我們這些天天在說自己不夠時間用的人。

然後,要定下目標,就是如何一步一步走向願望呢?出一本書,那你要寫書,寫完就找出版社,還是自己找人印等等。買包包,是那個包,幾多錢,譬如半年內買,那每個月儲幾多錢?用一個樽,還是開一個戶口?有沒有時間和budget找伊維特做個金錢魔法?學功夫,那就立即報名吧,等什麼?

說就說是願望,其實有很多steps可以立即做,只要清晰地列出來,空想就有可能變成事實。當中也可能有意外,例如有些steps一定要靠別人幫你做,但至少要盡力完成自己可以做的部份,都總算問心無愧。千萬別要只有一個願望在進行,因為真的會有意外,到時候你可以轉移視線,先進行別的願望,千萬不要因爲遇到挫折而停下來等待。有太多東西不是掌握在自己手裡,停下來怨別人,就只會讓整個人生都停下來,沒有一項願望向前移一步。(需知道別人也在進行他們的願望,人不為己,天誅地滅。。。)

每日做一點點,就算是一小步,也是接近願望一小步。

想願望成真,不用再許願了,自己把它實現吧!

我2018其中一個願望就是要每星期一篇BLOG,俾個like和subscribe這個blog鼓勵一下吧。

歡迎留言告訴我你的🐶狗年第一大目標是什麼,互相勉勵,加油加油⛽️!

唔得閒鍾意你

無拍拖同無拖拍嘅分別就喺呢度。

「無拖拍」就係想拍,但係無,有啲楚楚可憐嘅感覺。自己話自己都好啲,如果話人「你無拖拍」就是等如「你無嘢做」「你無錢用」「你無身材」咁樣。有時放假,屋企人問我係唔係「冇生意」,我覺得聽落去十分之唔順耳,然後我會更正佢地,我今日「放假」 ,即係唔會安排工作今日做。

「無拍拖」係一個選擇。自己選擇拍或者唔拍。如果有人出現,到時再作選擇。但係上面無拖拍嘅人,就係「如果有人出現就正喇!」嘅感覺,「你就好啦有拖拍」嘅感覺。「無拍拖」係唔會問人哋有冇仔/女介紹,但係冇拖拍嘅人就會用方法去識人,因為佢哋覺得有呢個需要,而點解有需要?就係因為心裡面有「欠缺」嘅感覺。就等於你個胃空虛你先要食嘢,你個心空虛你咪有衝動搵個人去填補。冇話啱定唔啱,但係呢份空虛嘅感覺應該由你自己個心話俾你聽,而唔係你身邊嘅人,或者傳統觀念話俾你聽「你冇拖拍,你爭緊啲嘢,你空虛啊」

一個人唔一定要有戀愛先至係complete,一條命可以分成好多段時間,有家庭,有事業,有理想夢想,有寵物,有朋友,有宗教,有愛情等等。你嘅寵物可能佔你60%嘅時間,有啲人會選擇全部時間畀晒教會,有啲人疊埋心水做家庭主婦。全部都沒有問題,你條命,你自己啲時間,你有權作主點樣去分配同埋運用,並唔係世界話俾你聽一定要有戀愛人生先至圓滿,就正如結咗婚都唔一定要生仔,雖然有人話生咗個仔先至覺得自己人生圓滿,但呢個係佢自己一個人嘅感受,唔通所有決定唔要小朋友嘅人人生都唔圓滿?唔通所有單親家庭都唔圓滿?唔通修女唔結婚,冇愛情人生就唔圓滿?

兩個人之間嘅愛情係美好嘅事,但愛有好多種,做人亦都有好多選擇,只要你自己覺得圓滿就是圓滿。題目嗰句「唔得閒鍾意你」就係話俾你聽,本小姐好忙,忙搵錢,忙孝順父母,忙住玩貓,忙住hea,總之冇時間分到出嚟鍾意你。我個人生已經滿到瀉。

農曆新年快到,如果各位單身人士又俾親戚問你幾時拍拖,你會點樣答呢?將你嘅答案留言喺我嘅Facebook page EVITA WONG, 或者喺呢個blog post下面, 歡迎繼續留言。

(留言唔凈在like埋啦😬)

你將要發問的問題

剪咗新髮型,想剪好耐,剪咗,就是這樣簡單。但自從剪短了,我天天都要回答一堆我不明白點解要問的問題。想同我傾計,可以搵第二個話題。「咦,剪咗頭髮呀?」「係呀~」這個可以接受,就像「咦,你返黎喇?」「係呀~」這個明知故問的開場白,有點無聊,但感覺親切的。

至於以下呢啲…我現在給你真實的答案。

「點解剪短嘅?」

why not?點解要問點解?有什麼問題嗎?點解我要有個原因去剪短啲頭髮?

「點解咁捨得?」

有什麼好不捨得?it’s hair, it grows back, why feel so attached? attachment會讓你享受不到很多做人的樂趣,浪費曬啲時間去唔捨得。而家仲要係講緊一啲走咗會返黎嘅嘢。

「點解有決心和勇氣?」

點解剪個自己想要的髮型需要決心同勇氣咁誇張?做想做的事我恨不得立即衝去做啦,為什麼需要決心和勇氣?換個髮型好危險咩?

「發生什麼事?」

就是剪短頭髮幾寸而已。個人一定要失戀或受打擊才能剪頭髮嗎?

實有人話「人地都係想同你打開話題,都沒有惡意」而我都不是說他們有惡意,只是純碎我答到想反眼,想大家思考一下問題背後是否真的有意義。我是享受silence的,有時不一定要說話。以為冬天蓋住紋身就不用回答重複性的問題,點知…..

不用評我的髮型喇,沒有什麼大不了,也不要批評你身邊朋友/ 男朋友/ 女朋友的新髮型,自己剪咗個什麼頭自己有眼看的,如果過不到自己也不會離開理髮店。

很久以前,有個女朋友告訴我她男朋友笑她的新髮型像個頭盔。原先她覺得這個髮型可以的,但男朋友講一講,她就不安心,不停問身邊的人是不是真的像個頭盔,是不是樣衰。人的信心就這樣容易被動搖,就被別人的一句話打散。

再嚴重的例子,就是男友說你胸細,樣衰,然後你去整容,佢又唔stop你,你出意外,毀容,死咗。

讚美嘅說話不妨,可以令世界多份歡樂,身邊的人心情好,氣場好,運氣好,你都有著數,是一條龍。批評說話就不用了,除了是反方向的另一條龍外,其實世界上有個東西叫「鏡子」,人家今天出門前已照過,人家自己覺得ok愉快就是了,實在不需要你的意見。謝謝。

阿叔,對唔住,放過我


各大品牌,真心感謝大家常常送我禮物,有些事是我從來沒有告訴你們的。

那些速遞阿叔!

好多次送錯地址,之後見到我時俾說話我聽。

他們很多時在沒有預約的情況下到咗門口(裡面無人),然後打來話我(有時來來回回好多次電話,仍然唔知自己想點咁,明明教咗佢點做,例如放在門口或給隔離舖頭代簽收)。

好多時極無禮貌。剛剛又有一個打來話在門口(無約我的,一早告訴所有人舖頭沒有opening hours,每天schedule不同),我話無人,都未來得及問什麼公司send嘢來他就cut我線。

仲有,我都搬咗半年有多,已update了新地址不只一次,但還是不斷有嘢送到舊地址。

我是一個人家送嘢俾你都要投訴的死八婆嗎?我不是。我沒有義務要受大叔們的氣。(仲有一次有個眼神古怪的對我怪笑..)

最後補一句,當然有啲好好的速遞員,但cut我線的比較多。收禮物個個女仔都鐘意,但呢啲大叔偏偏成為禮物的一部份。我知呢啲阿叔不是品牌的控制範圍,所以呢篇不算是投訴,只是想講啫,都無嘢做到㗎喇。🚬