無拍拖同無拖拍嘅分別就喺呢度。
「無拖拍」就係想拍，但係無，有啲楚楚可憐嘅感覺。自己話自己都好啲，如果話人「你無拖拍」就是等如「你無嘢做」「你無錢用」「你無身材」咁樣。有時放假，屋企人問我係唔係「冇生意」，我覺得聽落去十分之唔順耳，然後我會更正佢地，我今日「放假」 ，即係唔會安排工作今日做。
「無拍拖」係一個選擇。自己選擇拍或者唔拍。如果有人出現，到時再作選擇。但係上面無拖拍嘅人，就係「如果有人出現就正喇！」嘅感覺，「你就好啦有拖拍」嘅感覺。「無拍拖」係唔會問人哋有冇仔/女介紹，但係冇拖拍嘅人就會用方法去識人，因為佢哋覺得有呢個需要，而點解有需要？就係因為心裡面有「欠缺」嘅感覺。就等於你個胃空虛你先要食嘢，你個心空虛你咪有衝動搵個人去填補。冇話啱定唔啱，但係呢份空虛嘅感覺應該由你自己個心話俾你聽，而唔係你身邊嘅人，或者傳統觀念話俾你聽「你冇拖拍，你爭緊啲嘢，你空虛啊」
一個人唔一定要有戀愛先至係complete，一條命可以分成好多段時間，有家庭，有事業，有理想夢想，有寵物，有朋友，有宗教，有愛情等等。你嘅寵物可能佔你60%嘅時間，有啲人會選擇全部時間畀晒教會，有啲人疊埋心水做家庭主婦。全部都沒有問題，你條命，你自己啲時間，你有權作主點樣去分配同埋運用，並唔係世界話俾你聽一定要有戀愛人生先至圓滿，就正如結咗婚都唔一定要生仔，雖然有人話生咗個仔先至覺得自己人生圓滿，但呢個係佢自己一個人嘅感受，唔通所有決定唔要小朋友嘅人人生都唔圓滿？唔通所有單親家庭都唔圓滿？唔通修女唔結婚，冇愛情人生就唔圓滿？
兩個人之間嘅愛情係美好嘅事，但愛有好多種，做人亦都有好多選擇，只要你自己覺得圓滿就是圓滿。題目嗰句「唔得閒鍾意你」就係話俾你聽，本小姐好忙，忙搵錢，忙孝順父母，忙住玩貓，忙住hea，總之冇時間分到出嚟鍾意你。我個人生已經滿到瀉。
農曆新年快到，如果各位單身人士又俾親戚問你幾時拍拖，你會點樣答呢？
EVITAvsEVITA 
又講拍拖？拍到好攰啦
抖返一排先啦🤦🏻♂️
讚讚
睇下通勝有冇講幾時姻緣到咪知
讚讚
問：有無拍拖呀？
答：無呀，我好享受自己一個
再問：幾時結婚呀？
再答：人一定要結婚架咩？
讚讚
呢個係一個「關你咩事」同「關我咩事」ge問題😁
讚讚
我唔係你想像咁中咁饑餓
讚讚
隨緣啦呢啲嘢
讚讚
我咪同緊自己拍拖囉，拍得好sweet㗎
讚讚
搵夠錢咪拍囉
讚讚
Q: 拍拖未呀？
A: 係咪有好男人介紹先？
Q: 冇喎 你要求咁高
A: 咁你問嚟做乜
完
讚讚
：幾時拍拖啊？
：幾時都唔重要啦，你都唔係真心問，搵個話題咖姐😂
讚讚
：幾時拍拖啊？
: 有就有，無就無～想講自然會講，唔好年年問我，謝謝關心，大姑奶。
讚讚
幾時拍拖啊？
：我有太多兵長啦，一拍拖佢地會無左人生目標架～
讚讚
問：幾時拍拖啊？
答：咁你會唔會知你幾時中頭獎丫？
讚讚